MOS FUT URREJTJE ME PYETJET E TUA

  1. E pyeti njëra nga gratë shoqen e saj kur e lindi fëmijën:

“Çfarë të dhuroi burri me lindjen e fëmijës?!”

I tha:

“Nuk më dhuroi gjë.”

“Sa është kjo logjike? Ti a nuk ke vlerë te burri yt?” – ia ktheu ajo grua.

Me ato fjalë ajo e hodhi një bombë dhe u largua.

Burri i saj u kthye nga puna në mesditë dhe e gjeti gruan të zemëruar dhe u zënë mes vete dhe u fjalosën derisa erdhi çështja te divorci.

Prej nga erdhi problemi?!

Nga ajo fjalë që e tha ajo grua.

—————————————-

  1. E pyeti njëri shokun dhe i tha:

“E si po jetoni në këtë shtëpi, po çuditem me ju?! A është e mjaftueshme dhe e gjerë për ju?!”

“Kjo shtëpi për ne është e mjaftueshme dhe e gjerë, dhe ty kjo çështje nuk të intereson”, – ia ktheu shoku.

Ky njeri do që të futë përçarje në shtëpi dhe t’i nxitë anëtarët e saj të zihen mes vete. Kjo është e ligë.

—————————————-

  1. U takua me një djalosh të ri dhe të mrekullueshëm dhe i tha:

“Ku punon?!”

“Në shitoren e filanit.”

“E sa të paguan?!”

“Më paguan kaq (dhe e përmendi shumën).”

Ia ktheu:

“Vetëm aq?”

“Ti si jeton me ato të holla?! Pronari i shitores e meriton mundin dhe djersën tënde.”

Djaloshi filloi ta urrente punën dhe shkoi të kërkonte nga pronari rritjen e rrogës, u refuzua dhe e braktisi punën!

Ishte shumë mirë duke punuar, kurse tani mbeti pa punë.

—————————————-

  1. E vërejti prindin se ishte i qetë e i lumtur dhe i tha:

“Pse nuk po të viziton i biri shpesh?!”

Ia ktheu:

“Ka obligime brenda ditës dhe punon shumë.”

“E si po beson se nuk po ka kohë për ty që të të vizitojë?!”

Kjo fjali e ndryshoi zemrën e prindit, filloi të ndiejë urrejtje pasi zemra e tij ndiente lumturi dhe kënaqësi.

—————————————-

Ne shpesh në përditshmërinë tonë i parashtrojmë disa pyetje (Pse nuk e ke blerë këtë?! Pse nuk e posedon këtë?! Si po e duron këtë person?! E si po e lejon një gjë të tillë?! etj.) dhe fare nuk mendojmë se si do të ndikojë ajo pyetje te tjetri dhe si do ta kuptojë ai, dhe nuk e dimë se çfarë përçojnë këtë pyetje në shpirtin e atij që i dëgjon?!

Ndoshta qëllimi ynë nuk është i keq apo atë e bëjmë nga padituria, mirëpo ajo më vonë bëhet sebep që të shkatërrohen jetë, familje dhe pasuri e shumë gjëra të tjera. Prandaj, ki kujdes, mos fut urrejtje në zemrat e njerëzve me pyetjet e tua!

Nga arabishtja: Irfan JAHIU

 

 

 

SHPËRNDAJE