A e di se nëna e burrit tënd është çelës nga çelësat e lumturisë bashkëshortore?!
Merri këto këshilla se si të sillesh me nënën e burrit tënd, dhe me këtë të fitosh një nga çelësat e lumturisë tënde bashkëshortore:
1. Largoju ankesave drejtuar burrit tënd për atë që e vepron nëna e vet:
Ngase kjo është shumë e rëndë për burrin dhe ai bie në një pozitë shumë të keqe mes dy palëve të rëndësishme në jetën e tij, nënën dhe gruan e vet. Prandaj, kujdesu që ai të dëgjojë çdo gjë që e buzëqesh dhe nxit lumturi në shpirtin e tij dhe ia pakëson lodhjet dhe mundimet, kurse ankesa ka mundësi të jep rezultate jo të lavdëruara!
2. Fol për vjehrrën tënde mirë:
Pa marrë parasysh para saj apo larg saj, para burrit të saj apo familjes së saj, apo edhe të huajve, ngase kështu e ndjen vjehrra se kjo grua e do me të vërtetë dhe me sinqeritet.
3. Të vizituarit e saj dhe interesimi për gjendjen e saj:
Nëse ajo banon në shtëpi tjetër, atëherë vizitoje dhe interesohu për gjendjen e saj. Kjo është respekt dhe nder i madh për të, dhe kjo do të afron më tepër tek ajo, madje të bëhesh edhe më e dashur se bijat e saj.
4. Respektoje lidhjen e veçantë mes burrit tënd dhe nënës së vet:
Kjo do të thotë lëri asaj hapësirë me burrin tënd, nëse burri yt i flet diçka nënës së tij në vesh apo e kundërta, mos u lodh që ta dish se çka i tha asaj. Nga sjellja e mirë dhe respekti, është ta kuptosh se ajo çështje ty nuk të intereson!
5. Mbjell në shpirtrat e fëmijëve tuaj dashurinë ndaj gjyshes dhe gjyshit të tyre:
Mësoji ata që ta respektojnë vjehrrën tënde dhe të sillen mirë me të. T’i ndihmojnë nëse ka nevojë për ndihmë, t’i japin dhurata dhe gjëra tjera që aludojnë në respekt të veçantë ndaj saj!!
6. Jepi përparësi kërkesave të vjehrrës tënde:
Vjehrra e jote është grua e moshuar, ka qëndruar zgjuar dhe është lodhur dhe ka dhënë shumë për fëmijët e saj. Prandaj, e patjetërsueshme është të ndjesh se nevojat dhe kërkesat e saj janë parësore për t’u realizuar.
7. Takoje vjehrrën tënde e buzëqeshur dhe me buzëqeshje të sinqertë:
Buzëqeshja ka ndikim magjik, ajo mbjell dashuri në zemër dhe i largon problemet dhe mospajtimet mes vete.
Gruaja e vetëdijshme mundet të mësojë shumë nga vjehrra e saj, nëse e përmirëson sjelljen e vet. Mirëpo nëse sillet keq me të, do ta humb rehatinë e saj dhe ardhmërinë e saj. Islami na urdhëron që ta respektojmë të madhin.
Dhe në fund, rikujto se sa herë që imani yt është i thellë dhe i sinqertë, edhe sjellja e jote me nënën e burrit tënd do të jetë më e mirë!!
Nga arabishtja: Irfan JAHIU
