– Porosia e parë:
A i është drejtuar ndonjëri prej jush vetes me këto pyetje: Pse e mësova Kuranin? A për shkak se i shoqërova hafëzët, u bëra edhe unë hafëz? Apo për shkak se mësova në shkollën e Kuranit? Apo te njerëzit të njihem si hafëz i Kuranit? Apo se prindërit më detyruan të bëhesha hafëz? Para së gjithash, a do të ishte më e mirë të kujdesemi që ta përmirësojmë nijetin dhe ai çdoherë të jetë veç për Allahun?
Ijas ibn Amiri tregon se Alij ibn Ebu Talibi e kapi për dore dhe i tha: “Nëse mbijeton, ke për të parë se Kuranin e lexojnë tri lloje të njerëzve: njëri e lexon për Allahun, tjetri e lexon për të debatuar dhe i treti e lexon për dynjanë. Sipas nijetit që e lexojnë, ashtu shpërblehen.”[1]
– Porosia e dytë:
Prej obligimeve më të mëdha ndaj Kuranit është leximi i vazhdueshëm i tij dhe përsëritja e leximit përmendsh. Shpeshherë Allahu i përshkroi robërit e Vet të devotshëm se ata e lexojnë Librin e Tij ashtu si meriton të lexohet: “Pa dyshim, ata që lexojnë Librin e Allahut, falin namazin dhe japin fshehtazi apo haptazi nga ajo që u kemi dhënë Ne, mund të shpresojnë në një fitim që nuk do të humbasë.” (Fatir: 29)
Po ashtu, thotë: “(Megjithatë) ata nuk janë të gjithë njëlloj. Disa nga ithtarët e Librit janë në të drejtën: në orët e natës lexojnë ajetet e Librit të Allahut dhe falin namaz. Ata besojnë Allahun dhe Ditën e Kiametit, e urdhërojnë të mirën, e ndalojnë të keqen dhe nxitojnë për të bërë punë të mira. Këta janë ndër të drejtët. Çfarëdo të mire që të bëjnë, nuk do t’u mohohet shpërblimi. Allahu i di mirë të devotshmit.” (Ali Imran: 113-115)
– Porosia e tretë:
Pejgamberi, alejhi selam, e ilustroi leximin e Kuranit nëpërmjet një shembulli me pronarin e deveve, i cili, nëse i mban lidhur dhe kujdeset për to vazhdimisht, ato do t’i ketë nën kontroll.
Ebu Musa el-Eshariju transmeton se Pejgamberi, alejhi selam, ka thënë: “Lexojeni Kuranin vazhdimisht, se pasha Allahun, që shpirti im është në Dorën e Tij, Kurani largohet (harrohet) më shpejt seç ikin devetë kur janë të zgjidhura.”[2]
Ibn Omeri transmeton se Pejgamberi, alejhi selam, ka thënë: “Shembulli i atij që e ka nxënë përmendsh Kuranin është si shembulli i pronarit të deveve të lidhura. Në qoftë se i mban ato të lidhura, ai do t’i ketë ato nën kontroll, por në qoftë se i lëshon, ato do t’i ikin.”[3]
Andaj, ruaje atë që e ke mësuar, e mjerë për ty të bëhesh i pakujdesshëm kundrejt kësaj dhuntie që Allahu ta dhuroi.
– Porosia e katërt:
Besoj se i ke lexuar në Kuran fjalët e Allahut: “Ky (Kuran) është një libër i bekuar, që Ne ta kemi zbritur ty (Muhamed), për të përsiatur mbi ajetet e tij…” (Sad: 29) dhe “Vallë, a nuk përsiatin ata për Kuranin apo i kanë zemrat të kyçura?” (Muhamed: 24); pra meditimi i Kuranit dhe të punuarit me të janë esenca, andaj kujdes, preokupimi i yt të mos mbetet veç te leximi i shkronjave të tij.
– Porosia e pestë:
Shumica e të rinjve sprovohen me epshe dhe u dorëzohen motiveve e joshjeve që çojnë në fitnetë e përhapura në këtë kohë; ndërsa ju jeni të tjerë, çështja juaj është ndryshe.
Ndonjëri prej tyre në gjettë kohë të lirë, menjëherë e angazhon mendjen me pamjet e pista që i ka parë në revista apo në ndonjë film të fëlliqur dhe ia nxisin epshin, ndërsa ti, kur gjen kohë të lirë, lexon Kuran. Mus’hafin e mban me vete, kudo që shkon lexon prej tij. Kurse ai ka mundësi të lidhet me ndonjë vajzë, apo vajza të lidhet me ndonjë djalë, por kjo është adresa e vdekjes së zemrës dhe shenja e poshtërimit, Allahu na ruajttë! Ndërsa ti, brenga dhe aspiratat e tua lidhen me ndjekjen e pejgamberëve të Allahut dhe me njerëzit e mirë që Allahu e rrëfeu rastin e tyre në Kuran. Ai shkon pas vajzave që kanë prindër të pasur në dynja, ndërsa ti je i vendosur të martohesh me hyritë e Xhenetit. Prandaj, ik prej gjërave që i ndaloi Allahu, që ta arrish martesën me to në ahiret!
– Porosia e gjashtë:
Allahu njerëzit në këtë dynja i ka dalluar mes vete dhe i ka ngritur në shkallë: “Ai ju ka bërë pasardhës të njëri-tjetrit në Tokë dhe ka ngritur në shkallë disa nga ju mbi të tjerët…” (El-Enam: 165)
Po ashtu Allahu thotë: “Vallë, a mos janë ata që e ndajnë mëshirën e Zotit tënd? Jemi Ne ata që ua ndajmë njerëzve mjetet e jetesës në këtë botë, duke i ngritur në shkallë disa më lart mbi të tjerët, me qëllim që disa t’u shërbejnë të tjerëve…” (Ez-Zuhruf: 32)
Ja i shihni njerëzit përreth jush, zotëruan nga dynjaja çfarë mundën: prestigjin, pasurinë, pushtetin, suksesin. Ndërsa ju, edhe ju jeni sikurse të gjithë njerëzit, është e mundur që sytë tuaj ta hedhin shikimin në të mirat kalimtare, mirëpo, kur ju kujtohet që keni lexuar në Kuran porosinë e Allahut për Pejgamberin m: “Mos e hidh shikimin në të mirat kalimtare, që Ne ua kemi dhënë disave prej tyre, si stoli të jetës së kësaj bote, për t’i vënë ata në provë! Shpërblimi i Zotit tënd është më i mirë dhe më i qëndrueshëm.” (Ta Ha: 131); atëherë largoheni prej gjërave që i duan apo janë ata dhe kënaqeni me pozitën tuaj të lartë (miqtë e Allahut dhe të veçuarit e Tij).
– Porosia e shtatë:
O ju të dashurit e Allahut dhe të veçuarit e Tij! O ti që Allahu ta ngriti namin dhe vlerën, dije se ka njerëz që e përbuzën këtë dhunti dhe e ulën këtë pozitë!
A po e shihni, o ju hafëzë, se disa njerëz Kuranin e lexojnë nëpër manifestime jo të lejuara dhe të shpikura! A ju duket se ata e njohën hakun e Kuranit? Të tjerët Kuranin e shfrytëzojnë si mundësi për të përfituar materialisht dhe për tregti, duke marrë të holla të majme për t’ua mësuar atë. Disa hafëzë e shfrytëzuan Kuranin si mundësi për t’u prirë në namaz pushtetarëve e pasanikëve, saqë e përbuzën veten duke qëndruar me ta nëpër mexhlise ku nuk përmendet Allahu, përveçse pak. Shohin dhe dëgjojnë veprime që e kundërshtojnë fenë haptazi dhe qartazi, megjithatë as që lëvizin gojën e tyre të kundërshtojnë apo të ndiejnë xhelozi për fenë e Allahut. Disa të tjerë që rukjen e morën si profesion, Kuranin e shfrytëzuan si mjet për famë dhe pasuri, duke u lexuar të sëmurëve e duke e shfrytëzuar nevojën dhe dobësinë e tyre. E shumë të tjerë si ata, a ju duket se e njohën hakun e Kuranit?
E lus Allahun t’ju mbrojë që mos ta përbuzni veten dhe ta zëvendësoni pozitën që e keni, për diçka nga të mirat kalimtare.
– Porosia e tetë:
Ebu Hurejra transmeton se e ka dëgjuar Pejgamberin, alejhi selam, duke thënë: “Allahu nuk dëgjon diçka më vëmendshëm sesa që e dëgjon një pejgamber duke kënduar Kuran.”[4]
Po ashtu, Ebu Hurejra transmeton se Pejgamberi, alejhi selam, ka thënë: “Nuk është prej nesh ai që zërin e tij nuk e zbukuron gjatë këndimit të Kuranit.”[5]
Imam Neveviu, Allahu e mëshiroftë, tha: “Imam el-Kadi, Allahu e mëshiroftë, përcjell që dijetarët janë të një mendimi se pëlqehet zbukurimi i zërit gjatë leximit dhe këndimit të Kuranit”; prandaj zbukuroni zërat tuaj gjatë leximit të Kuranit dhe pasoni rrugën e pejgamberëve të Allahut.
(Pjesë nga libri: “Nxënia përmendsh e Kuranit” – është i përkthyer në shqip)
Dr. Muhamed ed Duvejshi
Nga arabishtja: Irfan JAHIU
[1] Darimiu (3329), Axhuriju (fq.25)
[2] Buhariu (5033), Muslimi (791).
[3] Buhariu (5032), Muslimi (789).
[4] Buhariu (5023), Muslimi (792).
[5] Buhariu (7527).
