Shprehjet e lëvdatës dhe admirimit tek unë kishin domethënie të madhe. Edhe unë, si vajzat e tjera, të përshkruhesh që je e bukur dhe e hijshme, e llogarisnim medalje të shtrenjtë. Por, më vonë e paguanim shtrenjtë, sepse na shtynte të bënim gara se kush prej nesh po shfaq më shumë prej bukurive të trupit.
Pasi u kthjella nga dehja e epshit dhe Allahu më udhëzoi në rrugën e punëmirëve, kuptova se ka fjalë miradije më të larta dhe më të mëdha se ato të njerëzve. Ato janë lëvdatat e Allahut që i zbriti në Kuran, të cilat do të lexohen deri në Ditën e Kiametit:
Allahu thotë: “Gra të mira janë ato të dëgjueshmet, që ruajnë fshehtësitë që ka urdhëruar Allahu.” (En Nisa, 34)
Po ashtu Allahu thotë: “Me të vërtetë që për myslimanët dhe myslimanet, besimtarët dhe besimtaret, të bindurit ndaj Allahut dhe të bindurat ndaj Allahut, të drejtët (të sinqertët) dhe të drejtat (të sinqertat), duruesit dhe durueset, të përulurit dhe të përulurat, mirëbërësit dhe mirëbërëset, agjëruesit dhe agjërueset, ruajtësit e nderit dhe ruajtëset e nderit, përkujtuesit e Allahut vazhdimisht dhe përkujtueset, pra, për të gjithë këta Allahu ka përgatitur falje dhe shpërblim të madh.” (El Ahzab, 35)
Kur e urdhëroi Allahu besimtaren të mbulojë trupin, e nderoi dhe ia ngriti namin asaj, duke e ndërlidhur çështjen e mbulesës me gratë më të mira, me gratë dhe bijat e Pejgamberit m: “O Profet, thuaju grave dhe vajzave të tua, si dhe grave të besimtarëve, që të lëshojnë mbulesën e tyre (të kokës) përreth trupit. Kjo është mënyra më e përshtatshme që ato të njihen e të mos ngacmohen nga të tjerët. Me të vërtetë, Allahu është Falës dhe Mëshirëplotë.” (El Ahzab, 59)
Sa u përket vajzave që garojnë mes vete për lëvdatat dhe admirimet e pasuesve të epsheve, le të marrin parasysh paralajmërimin e ashpër që na e tregoi Pejgamberi m.
Ebu Hurejra tregon se Pejgamberi ﷺ ka thënë: “Dy lloje njerëzish prej banorëve të Zjarrit ende nuk i kam parë: disa njerëz që mbajnë në dorë kamxhikë si bishtat e lopës, me të cilët i rrahin njerëzit, dhe disa gra të veshura, që realisht janë të zhveshura, ecjen e kanë provokuese, duke e tundur trupin. Kokat e tyre duken sikurse gungat e shtrembra të devesë. Ato nuk hyjnë në Xhenet e as e nuhasin aromën e Xhenetit, edhe pse aroma e saj ndihet prej një distance kaq të largët.”[1]
Ndërkaq, vajza që parfumohet dhe del prej shtëpisë me qëllimin e vetëm që ta tërheqë vëmendjen e djemve, mjerë ajo prej këtij paralajmërimi profetik:
Ebu Musa el Eshariu tregon se Pejgamberi ﷺ ka thënë: “Ajo grua që parfumohet dhe kalon pranë burrave, që ta nuhasin erën e parfumit të saj, ajo është shkaktare për t’i futur ata në gjynah (sepse ua tërheq vëmendjen ta shikojnë, ndërsa zinaja e syve është shikimi).”[2]
Dr. Muhamed ed Duvejshi
Nga arabishtja: Irfan JAHIU
(Pjesë nga libri: “E TILLË ISHTE JETA IME (Memoaret e një vajze)” – i përkthyer në gjuhën shqipe)
[1] Muslimi (2128).
[2] Ahmedi (19212), Ebu Davud (4173), Tirmidhiu (2786), Nesaiu (5126).
