- Dobësimi i besimit
Besimi në Allahun është siguri dhe paramburojë prej gjynahut. Është shkëmbi që epshet e nefsit të mbrapshtë thyhen në të. Çdoherë që imani dobësohet, rreziku bëhet më i madh që të shkelen kufijtë e Allahut. Si ta merr mendja: a ka guxim të jepet pas gjynahut personi që e adhuron Allahun sikurse ta shohë Atë? Po edhe sikur të bjerë në gjynah, a mendon ti se do të këmbëngulë në veprimin e atij gjynahu?
Prandaj, dobësimi i imanit llogaritet të jetë prej shkaqeve të mëdha që çojnë të zhytemi në baltën e epshit.
- Shoqëria e keqe
Rishikoji shokët një nga një. Hulumto në mesin e tyre në mos rastësisht ke ndonjë shok që në Ditën e Kiametit do t’i thuash: “Ah, sikur të mos e kisha bërë filanin mik! Ai më ka larguar nga Këshilla (Kurani) që më kishte ardhur!” (El Furkan, 28-29)
Shikoji se a janë prej atyre që dëshiron të ringjallesh me ta në Ditën e Kiametit? Pejgamberi ﷺ ka thënë: “Njeriu është me atë që do.”[1]
Vallë, a je i kënaqur me fenë dhe fetarinë e gjithë shokëve të tu? Kujtoje hadithin e Pejgamberit ﷺ: “Njeriu është në fenë e shokut të tij, andaj le të shikojë secili se kë merr për shok.”[2]
Për në fund cilës palë u takojnë ata? Atyre që shesin parfum e u vjen era e mirë apo atyre që merren me farkëtari dhe shpërndajnë erë të pakëndshme. Besoj se ke dëgjuar për hadithin e Pejgamberit ﷺ, i cili ka thënë: “Shoku i mirë dhe i keq i shëmbëllejnë mbajtësit të miskut dhe farkëtarit.”[3]
Në njëfarë forme shoqëria e ka ndikimin e saj në çdo fazë të jetës, por më i theksuar është në periudhën e rinisë, ku shoku për shokun e fut veten në zjarr. Në këtë mënyrë shokët e fusin shokun e tyre në baltën e epshit.
Revista kuvajtiane kreu një studim rreth problemeve të rinisë, ndër të cilat shkruan: “Një i ri tregoi se për herë të parë në jetë, para disa vjetësh, kishte shikuar film pornografik. Ngjarja ndodhi gjatë një vizite që i bëri njërit prej shokëve të tij, i cili e lëshoi filmin në dhomën e tij.[4]
Një tjetër e tregon rastin e vet pas rikthimit të tij në Qendrën e Kujdesit Social në Riad (kryeqytetin e Arabisë Saudite): “Ardhja ime sërish në këtë vend është se iu riktheva të njëjtit problem dhe shokëve të këqij. Pasi dola herën e parë prej këtij institucioni, ata më prisnin jashtë. Më ftuan t’u bashkëngjitëm atyre në rrugën e mëhershme. Pasi ma zbukuruan të shëmtuarën dhe ma shëmtuan të bukurën, më bënë ta harroja pendimin dhe vendosmërinë time që të kthehesha në fe. Rikthimi im në këtë institucion erdhi pasi nuk gjeta zgjidhje tjetër si të largohesha nga ajo rrugë e keqe.”[5]
Me shokë të këqij nuk nënkuptohen njerëzit që kanë dalë prej burgjeve ose institucioneve të përmirësimit e as është kusht të jenë duhanpirësit, siç mendojnë e pretendojnë disa të tjerë.
Po, shok i keq është çdokush që ta zbukuron gjynahun ose ta shëmton adhurimin. Ai mund të jetë djali i mixhës ose dikush nga akrabaja, madje edhe vëllai yt.
Për fund, nga shoku i keq largohu menjëherë e mos u largo gradualisht. Nëse sot zbulon që shoku yt nuk qenka si duhet, të nesërmen duhet t’i ndash rrugët me të. Shembulli i atij që nuk largohet menjëherë nga shoqëria e keqe është si shembulli i atij që është mësuar të hajë ushqim të pashëndetshëm. Më herët hante tri herë në ditë e, pasi kuptoi se ushqimi i tij është i dëmshëm, e zvogëloi në dy herë në ditë, që pas një kohe ta braktiste më lehtë. Por, kjo nuk jep rezultat, sepse qoftë dy herë, qoftë tri herë, ushqimi i pashëndetshëm ndikon keq në shëndet. E s’ka dyshim se largimi jo i menjëhershëm prej shokut të keq është më i dëmshëm dhe më i rrezikshëm se largimi i jo menjëhershëm prej ushqimit të keq. Sikur ta meditosh mirë këtë gjë, do të të qartësohet shumë më tepër, me lejen e Allahut.
- Shikimi në haram është shigjetë prej shigjetave të Iblisit
A të duket në rregull që shikimin ta lëshosh andej-këndej e pastaj të thuash se cili është shkaku i ndezjes së epshit. Çfarë mendon: a i ka hije një myslimani si ti që shikimin e tij ta ngulitë në televizor e të shikojë femra ose të ndjekë filma të fëlliqur ose revista të shthurura ose të dëgjojë këngë me tekste të fëlliqura? Në sytë tanë je llogaritur më i mençur dhe më i urtë se punët që po i bën! E, në fund, po interesohesh për shkakun dhe po e kërkon ilaçin: “Thuaju besimtarëve që të ulin shikimet e tyre (nga e ndaluara) dhe ta ruajnë nderin e tyre (nga marrëdhëniet e jashtëligjshme)! Kjo është më mirë për ta! Me të vërtetë, Allahu është i Dijshëm për atë që bëjnë ata. Thuaju besimtareve që të ulin shikimet e tyre (nga e ndaluara)…” (En Nur, 30-31)
- Koha e lirë dhe vetmia
Njëherë e këshilloj veten e pastaj të këshilloj ty që të jesh i kujdesshëm kundrejt një shkaku tjetër që e shkakton nxitjen e epshit, përkatësisht koha e lirë dhe vetmia. Kur je vetëm, u dorëzohesh mendimeve dhe kujtimeve, e shejtani mundohet ta marrë situatën nën kontroll, që të zhytë në mendime me epsh dhe kënaqësi. Njëherë fillon me mendim, pastaj mendimi zhvillohet derisa bëhet preokupim, e më pas kalon në vullnet, e hap pas hapi në shumicën e rasteve deri në masturbim, e kjo mund të çojë deri në imoralitet. Masturbimi është i ndaluar, ndërsa pasojat e tij janë të rënda: pikëllimi dhe brenga, rënia në ambicie dhe humbja e dinjitetit, pasoja në kujtesë dhe dëme në shikim, kërrusje në shpatulla, dobësi në tretje etj. Teprimi me masturbim në të ardhmen mund të shkaktojë paaftësi në kryerjen e marrëdhënieve bashkëshortore. Para së gjithash, masturbimi është shkelje e kufijve të Allahut, ashtu siç thotë Allahu: “… pikërisht ata janë shkelësit.” (El Mearixh, 31)
Më ndalove t’i shoqëroj të këqijtë dhe më urdhërove t’i zgjedh shokët, e unë iu përgjigja urdhrave të tu! Tash më ndalove të qëndroj i vetëm? Besoj se këto pyetje dëshiron të m’i parashtrosh, por kërkoj ndjesë se fillimisht nuk dua të të lodh më shumë. Pak më vonë, te kapitulli mbi ilaçin, do ta gjesh përgjigjen e pyetjeve të tua, me lejen e Allahut!
- Mendimi me epsh është sëmundje e rrezikshme
Prej mëshirës dhe drejtësisë së Allahut është që robin nuk e merr në llogari për mendimet e tij, përderisa nuk i shpreh ato ose nuk punon sipas tyre. Ka të rinj që kënaqen të mendojnë me epsh. Në fillim u duket e sikletshme “për të riun më e dashur është të kërcejë nga qielli se ta veprojë atë që i sillet në mendjen e tij”, por, nëse mendimet vazhdojnë dhe nuk i ndërpret, ato dikur i bëhen rutinë, saqë i kujtohen edhe gjatë faljes së namazit! Kur mendimet vijnë një pas një, atëherë epshi nis të vlojë dhe t’ia pushtojë zemrën e t’i ngjasojë vullkanit që kërkon rrugëdalje si të shpërthejë.
Ruaju mirë nga të menduarit me epsh! Çdoherë që troket në derën tënde, këputja rrënjët. Mendimet e tua orientoji atje ku ka dobi për dynjanë dhe ahiretin tënd. Medito rreth krijimtarisë së Allahut, madhështisë së Allahut, për Ditën e Kiametit, për gjendjen e dhimbshme të umetit etj.
Dr. Muhamed ed Duvejshi
Nga arabishtja: Irfan JAHIU
(Pjesë nga libri: “SI TË BALLAFAQOHESH ME EPSHIN” – i përkthyer në gjuhën shqipe)
[1] Buhariu (6168), Muslimi (2640).
[2] Tirmidhiu (2378).
[3] Buhariu (5534), Muslimi (2638).
[4] Revista “El Enba El Kuvajtije” (13/8/87).
[5] Revista “Dar el Mulahadha”, numri 3, (f. 51), “Virtytshmëria dhe rrugët e saj” (f. 59).
