Pyetje:
Dua të shkoj në umre, dhe si rrespekt që kam ndaj babait tim, një ditë i mora leje për të shkuar në umre, mirëpo nuk më lejoi duke u arsyetuar me gjëra që nuk janë të arsyeshme që të ma ndalojë mua shkuarjen në umre, çfarë më këshilloni në këtë rast dhe a hy në mëkat nëse shkoj në umre pa pëlqimin e babës?
Përgjigje:
Nuk të takon ty dhe nuk duhet të shkosh në umre pa lejen e babës, përderisa kryerja e umres nuk është Farz sikurse kryerja e haxhit.
Nëse të lejon të shkosh në umre babai, atëherë mund të shkosh, përndryshe nëse nuk të lejon të shkosh, atëherë mos shko, por qëndro në shtëpi tek babai yt.
Sepse, një njeri erdhi tek pejgamberi alejhi selam dhe i mori leje për të shkuar në Xhihad.
Ndërsa Pejgamberi alejhi selam i tha:
A i ke gjallë dy prindërit e tu?
Tha: Po, o i dërguar i Allahut.
Pejgamberi alejhi selam, i tha:
Shko tek prindërit, aty e ke xhihadin (shpërblimin e xhihadit).”
(Buhariu: 3004, Muslimi: 2549).
Kurse, një njeri tjetër kërkoi leje për të shkuar në haxh vullnetarë (nafile) dhe e lajmëroi Pejgamberin alejhi selam se nëna e tij nuk po e lejon të shkoj në haxh.
Atëherë, Pejgamberi alejhi selam, i tha: Ktheu tek nëna yte dhe mos shko në haxh.
Shejh Abdullah el Humejdi, rahimehullah.
Nga arabishtja: Suad Shabani
